Gure Señeak Elkarteak gaixotasun arraroak edo urritasun larriak pairatzen dituzten haurrei eta familiei laguntzen die

Gure Señeak Elkarteak gaixotasun arraroak edo urritasun larriak pairatzen dituzten haurrei eta familiei laguntzen die

Asteazkenean Derion izan ginen, Gure Señeak Elkarteak antolatutako emanaldian. Gure Señeak Elkartea irabazi-asmorik gabekoa da, gaixotasun arraroak edota urritasun larriak pairatzen dituzten haurren familiei laguntzeko sortua.

Irri, kantu eta dantza aritu ostean, afari goxoa ere eman ziguten. Ederki pasa genuen elkarrekin, katxiporreta! Eta beste behin ikasi genuen tristurak eta pozak goxoagoak direla elkarrekin konpartitzen ditugunean.

Bada elkartearen aldeko manifestu bat eta polita iruditu zaigu hemen leku egitea:

GURE SEÑEAK EKARTEAREN ALDEKO MANIFESTUA

AUKERA BATEN BILA

ELKARTASUNAK eta ITXAROPENAK batzen gaitu gaixotasun arraroak edota urritasun egoera bereziak pairatzen dituzten DERIOKO haurrei AUKERA bat eman asmoz manifestu hau sinatzen dugunok.

Gaixotasun arraro batekin edo urritasun egoera berezian bizitzea pisu handiko desafioa haur hauentzat eta familientzat. Gerlari nekaezinak dira, jasaten duten minetik ikasiz eta irakatsiz, eta eredu dira guztiontzat. Baina oraindik aurrera ez daude bakarrik.

Azpian sinatzen dugunok babesa ematen diogu GURE SEÑEAK Elkarteari, honek egindako lanak familia hauen errealitatea alda dezan, eta egunez egun gero eta pertsona, elkarte, profesional, ikerlari, enpresa eta administrazio gehiagok lan egin dezan norabide honetan, gure itxaropena egia bihurtzeko.

Haur hauen begietara begiratu eta haien irribarreaz kutsatu nahi dut. Haien geroaren alde egin nahi dut; bizitza luze eta duinaren alde, gaurdanik, izan ere “GAUR BETI DA ORAINDIK”.

Manifestu hau www.gureseneak.org helbidean topa dezakezue eta nahi izanez gero, sinatu eta haiei helarazi.

Elkarteko lagunekin dantzan

Elkarteko lagunekin dantzan


Bizarra Lepoan, ibili munduan! ARG.Bizarra Lepoan

Bizarra Lepoan, ibili munduan! ARG.Bizarra Lepoan

Getxoko Bizarra Lepoan euskara elkarteak antolatuta, joan den asteartean, reetako Xake plazako karpapean izan ginen. Sekulako giroa sortu zen, 2500 lagun inguru batu ginelarik bi saiotan. Bide batez, horiek prestatzen lagundu duten elkarte zein norbanako guztiei eskerrak emateko aukerarik ez dute galdu nahi izan euskara elkarte getxoztarreko kideek: “UKTEST txalaparta elkartea, Lauaxeta AEK, Kukupraka ludoteka, UKBERRI.NET Uribe Kosta eta Erandioko agerkari digitala, Getxoko Udala, Garazi, Maria, Maialen K., Kepa, Andrea, Irune, Peio, Maialen A., Ainhoa, Iñigo, Luzia, Karlos, Ziortza, Irantzu, Rozio, Iñaki eta Lander. Ezin izango genukeen hau guztia aurrera eraman zuen laguntza barik. Bihotzez, eskerrik asko!”. Pailazook ere eskerrak eman nahi dizkizuegu Getxoko Irrien Lagun txintxurri guztiei! 2500 muxu zuei!

Uztailaren 14tik 27ra, kultur arloko hainbat ordezkarirekin batera, Palestinan izan zen Porrotx, bertako errealitatea hurbiletik ezagutu asmoz: Ezagutu, ezagututakoa maitatu eta era berean elkartasuna eskaini. Musikariak, bertsolariak, zinegileak, unibertsitateko irakasleak… guztiak arazoaren muinean murgilduak, herri bat sentitzera joanak. Bidaian,bilera eta hitzordu artean, leku egin zioten umoreari eta festari ere. Izan ere, palestinarrek pairatzen duten zapalkuntza eta errepresioaren aurrean, irribarrea baita bertara eraman daitekeen gauzarik politena.

Adinekoak eta haurrak harritu eta alaitu zituen Porrotxek erdi arabieraz egindako emanaldietan. Izan ere, haurrak mundu guztian berdintsuak baitira, eta sufritzera eta hain lotuta bizitzera ohitutako herri honek ere hori erakutsi die, familia kartzelan edo hila duten umeek jolasteko, amets egiteko eta irri egiteko gogoa dutela.

Honen inguruan gehiago jakiteko, sartu txintxarri aldizkarian eta irailaren 5eko Berrian.

Eskualdeko euskararen aldeko festa izango da igandean, irailak 19, Añanan (Araba). 11:00etan hasiko da jaia, eskulangileen azokarekin. Ondoren, haurrentzako herri kirolak eta Porrotxen eta Txan magoaren ikuskizunak izango dira, baita bertsolariak ere. 14:15ean, Añana Kantuz jaialdia egingo dute txistulari, trikitia eta txalaparta doinuez lagunduta. Añako eskualdean urtero iraila aldean ospatzen dute euskararen jaialdi hau,Euskara Añanan Mingainean” eta urtero herriz aldatzen dute. Ikastolen jai erraldoiekin alderatuta erromeria xumeagoa da, baina familian euskaraz igande pasa egiteko beti ederra.  Primerako plana gertutik ikusteko.

Familia ereduak etengabeko bilakaeran ari dira, bai Petra katuarena ere.

Familiak etengabeko bilakaeran ari dira, bai Petra katuarena ere.

Josu Imanol Unanuek familia ereduen aniztasunaz eta hauen bilakaeraz idatzi zuen Gaur8n. Pailazook azken urteotan hainbat elkarterekin elkarlanean landutako Familiak Milakolore proiektua aipatzen du bere gogoetan. Hona iruzkinaren mostratxo bat: “pailazo adimentsu batzuek aspaldi jarri zuten eredu berri batzuen jokoa, Porrotx eta bere lagunei esker, gure loba batek bere familiari buruzko lan bat egin zuenean ikastolarako, prest egon zen bere «lehengusina Petraren» argazkia gehitzeko, gero berak irribarretsu esan zuen modura: «Nik bakitaz nortzuk direzen neure familiakuek, eta Petrita, nahiz eta katue izan, zuen alaba eta neure lehengusinie da, ahal doten guztie egingo dot hori azaltzeko»”. Gure ingurua, guziona, asko aldatu denaz ohartarazten gaitu Josu Imanolek. Horretaz ohartzea eta garen modukoak garela onartzea guztion eskubideak defendatzea dela dio. Kontrakoa, aldiz, bakarrik geratzea.

Orrialdeak denera: 51« Lehena...102030...3839404142...50...Azkena »