Mezu honen bidez pailazoon AMALUR ikuskizun berria iragartzen duen posterra aurkeztera gatozkizue, emakume baserritarraren eguna den honetan hain juxtu. Izan ere, baserria landuko baitugu oholtzan datorren azarotik aurrera. Laister izango duzue honen berri.

Gaur emakume baserritarrari eman nahi diogu titularra, baserrian egiten duen lana aitortu. Emakumea ez da bakarrik sutondoan egoten, hala kontatzen bada ere. Kontatzen ez dena da ukuiluan, baratzean, sukaldean, haurraren sehaska kulunkatzen eta baserriko nagusienak zaintzen egiten duen lana. Denera iritsi behar du baserriko emakumeak, denak zaindu eta kontentatu behar ditu, bere burua deskuidatuz maiz.

Nahiz keinu txikiak sumatzen hasiak garen, emakume baserritarra ikusezina da legearen begietara eta bide malkartsua du parekidetasunerantz. Egoera horri buelta ematen hasiak dira azken urteotan emakume baserritarrek sortutako hainbat elkarte.

Nabarmena da baserria aldatzen ari dela, eta baserriko emakumeak aldaketa garaia baliatu nahi du lurrari buelta eman eta berdintasunaren hazia ereiteko, baserriaren mesedetan.

kartela Amalur - ok

Baztan Ikastola Nafarroako Ikastolen Elkarteko 15 ikastolatako bat da, eta aldi berean, Baztango 15 herri-eskolen artean bat gehiago ere bai. Haien eraikinak publikoak dira, Udalarenak, eta nahiz diruz lagundu, aurrekontua gero eta murritzagoa da, eta ez dago ikastolaren beharrei aurre egiteko diru nahikorik.

Bi eraikin ditu Baztan Ikastolak, Haur Hezkuntzako ikasleak daude batean eta Lehen Hezkuntzakoak bertzean. Xumeak dira helburuak, egoerari lotuak:

  1. HAUR HEZKUNTZAKO ERAIKINA MOLDATZEA, sabaia konpontzea, zorua aldatzea eta isolamendua hobetzea: gelak ttipi gelditu dira, batez ere psikomotrizitate gela. Horretaz gain, parkeko zoruan moldaketak egin nahi dituzte. Lohiez betetzen da euria egiten duelarik eta arazo hori konpontzea xede dute.
  2. LEHEN HEZKUNTZAKO ERAIKINA HOBETZEA, patioa estaltzea eta isolamendua hobetzea: euria ari duelarik jostatzeko estalperik ez dute haurrek eta isolamendu gabezia nabarmena da eraikin osoan, hartara, Nafarroa Oinezen jasotako dirua patioan estalpea jartzeko eta leihoak aldatzeko erabiliko dute.

“HAMABORTZ, AMA BAT. 2015eko Nafarroa Oinez Baztan Ikastola mantentzeko eta hobetzeko ibiliko dugu. Gure AMA hizkuntza den eskuara bere kabian sentitzen den bilgunea bizirautea xede. Hizkuntzak osasuntsu edo sasoian aitzinet egiteko Baztan bezalako hizkuntza espazioa behar du, bera nagusi den esparruak behar ditu, geografikoa ez bertze erabilera eremu bati lotua ere, irakaskuntza kasu. Oztopoak oztopo, Baztan Ikastolan eskuara eta euskal kultura bizi daitezen ekinean segituko dugu. Pausoka, oinez, lan eginez, ametsak egia bihurtzea lortuko dugu.”

[youtube]https://www.youtube.com/watch?v=f0I4r9Dm1GE[/youtube]

Datorren igandean, urriaren 11ean Pausoka Elkartearen egun handia ospatuko da Urnietako San Juan Plazan. Orotariko ekintzez betetako egitarau oparoa antolatu dute, Pausokako haurrak proagonista direla. Porrotx eta Ane Pirata ere bertan izango dira. Tiketak aurrez eskura ditzakezue Urnietako BM dagoen plazako Betibeauty liburudendan.
Pausoka, ametsak betez!  ‪#‎unpasitoporpausoka‬

Pirritx gure txori lirain eta argiaren urtebetetze eguna ospatzen dugu gaur. Primaderak betez eta abenturak biziz, jarraitu ezazu gure bizitzak alaitzen. Ilargiraino eta buelta maite zaitugu. Porrotxek dioen moduan: “Itzali pastela eta jan kandela!”

Gaur Txo MikMak Txikia agurtu dugu Bizipozaren Jaian. Txistulariak, dultzainariak, tailerrak, puzgarriak, paellada erraldoia, batukada… Goizean goizetik jende mordoa lanean gaurko egitarau oparoan. Irrien Lagunak Gizartegintza osatzen duten elkarteak ere gurekin izan dira, haien egoeraren eta baloreen berri emanez. Gure txoko txikitik, mila-pila eskerrik asko gerturatu zareten guztioi, 5. urtez Bizipoza emateagatik! Maite zaituztegu, katxiporreta!

Orrialdeak denera: 44« Lehena...10...1819202122...3040...Azkena »