MuSUz eta IRRIz beteriko 2019 opa dizuegu!

Zorionak eta mila pila esker bertsolari guztioi, filosofia tratatu bat, gure ametsak,… zortzi esalditan, errimatuta, koloretan marrazteagatik.
Eta oraingoan bereziki, besarkada bero bat zuri, Onintza! Muxikatik mundura kantari…💛🧡❤️💚💙💜

Atzo goizean FAMILIA MILAKOLORE proiektua aurkeztu genuen, MUSUA disko-liburuarekin batera kaleratu duguna, biak batean alegia. Familia milakolore diskoaren diseinua eta bertako Zebra kolorezalea abestiaren bideoklipa Txakur Gorria kolektiboak egin du: Ikusi ZEBRA KOLOREZALEA bideoklipa

15 urteren ostean, familia ereduen aniztasunaren lanketa egin dugu berriro elkar argitaletxearekin elkarlanean. Miren Amurizak idatzitako eta Julian Toquerok diseinatutako kartoizko ipuin bilduma duzue eskura, baita familien karta-jokoa ere. Ipuinak diskoan ere entzungai daude, FAMILIA MILAKOLORE abesti bildumarekin batera.

Atzo egun hunkigarria izan zen pailazoontzat. Goizean MUSUA disko-liburu berria aurkeztu genuen prentsaurrean eta arratsaldean BOROBILEAN azken saioa eskaini genuen, hau dena gure herrian, Lasarte-Orian.
Goizean, amets berri hau burutzen lagundu digutenak gure ondoan egon ziren: abestien hitzak egin dituen Leire Bilbao, musika egin duen Xabier Zabala Garcia ilustrazioak egin dituen Maite Mutuberria eta diskoa grabatu duen Garate Studioseko Kaki Arkarazo. Hauetaz gain, Irurtzungo Orritz Iskidi elkarteko joaldunek eta Lasarteko Xumela koruak aurkezpena girotu ziguten eder asko. Kalejira alaia egin genuen Lasarteko kaleetan zehar.  
Arratsaldean berriz, BOROBILEAN saioan, Jalgune Elkarteako kideak, Ahobizi eta Belarriprest izan ziren gurekin oholtza gainean kantu eta dantzan. 
Pailazook dagoeneko, mesanotxian jarri ditugu atzoko irudi hauek. Eskerrik asko denoi!